عدد الرسائل : 172 العمر : 37 الوظيفه : welder تاريخ التسجيل : 26/09/2008
موضوع: إنت داخل ليه ..!! الثلاثاء يوليو 21, 2009 6:54 pm
مبدئيا انا حابب أنوه إن الموضوع دة مفيش ولا كلمه فيه من كلامي أو من كتاباتى
ولكنه من أشد المواضيع اللى شوفتها بحياتى واللى أنحنى ليها إحتراما وتقديرا لكل كلمة بتتقال فيها ..
------------------------------------------------
مش عارف كالعادة لما بكتب الكلام ممكن يتاخد بمحمل وحش ! وممكن يتفهم غلط ، وممكن لو حد شاكك إنه عمل حاجة فأنا قصدته ، لكن في المجمل أنا بحاول أنقد اللي بيحصل !
الموضوع لا يمت لأي شخص أو أي جهة أو أي موضوع بأي صلة بل هو مجرد ذكر لبعض الإنتقادات التي أراها .... وأرجوا عدم الخروج عن النقاط المذكورة في الموضوع . بداية الإشاعات ! إيه اللي عمال يحصل في قلب المنتدي ده ! يعني خلصنا من اللي داخلين يتعرفوا ورسايل خاصة واللي خلاص إتجوزوا في الرسايل الخاصة واللي يمكن جابوا عيال فيها وإحنا مش عارفين ، بنفكر نفتح مستشفي للحالات الطارئة في الموقع .
واحد يدخل يقولك إلحق ده بيخطفوا العيال واللي يقولك ده بتحرشوا بمش عارف مين وغيره وغيره !!!!!
هو خلاص عشان لقينا ممكن ننشر فيه سمومنا نقوم نعمل كدة ، أنا شخصياً بفكر أعمل نظام في الموقع ونظام مخالفات لمنع نشر الإشاعات ! يا جدعان محدش يكتب خبر غير لما يكون واثق منه ومن المصدر أو شافه بنفسه ، لكن نظام النقل من فلان لفلان بيجيب وششششششششش كتير وكلام أكتر ، وزي ما أنا شايف بقي فيه شريحة كبيرة في الموقع ما شاء الله زي الفل من كذا كلية وكله بينقل كلام كله والأطرف إنك لو جيت في موضوع واحد بيتكلم عن إشاعة واحدة تلاقي الكلام كله بيناقض نفسه ! كلام مش راكب علي بعضه .
قال سبحانه وتعالي في كتابه الكريم :" يا أيها الذين آمنوا إن جائكم فاسق بنبأ فتبينوا أن تصيبوا قوم بجهالة فتصبحوا علي ما فعلتم نادمين" .
الإشاعات مكانها مش هنا الله يكرمكوا بجد ، ممكن تتكلموا في أي حاجة ، تنقلوا خبر من جريدة وتتناقشوا فيه ، لكن كلام مش موثق أو أو يا جماعة بجد حرام عليكوا اللي بتعملوه في نفسكوا !
الموضوع التاني بقي واللي إنتشر فجأة ومن لاشئ كدة واللي لما حاولت زمان أعمله بنظام أو أمشيه بشكل متتابع لقيت ناس بتكلمني وبتاع ومش عارف إيه ، وسبحان الله نفس الناس دلوقتي لقيتهم عاجبهم الأمر !
الغريب في الأمر بقي مش كده ، الغريب اللي يدخل يكتب موضوع ويرد عليه ناس وتلاقيه مسجل بعضوية تانية ويرد علي نفسه ! جاي يجرب إنفصام الشخصية عندنا ! وللأسف محسوب علينا عضو !!!
لا والغريب لما يتعمل موضوع ويمشي كويس أوي وتلاقي فجأة واحد دخل غير مجري ولا مسار الموضوع وبيتكلم في حاجة ملهاش لازمة أو ملهاش علاقة بالموضوع أو يكون عامل الموضوع ويجي يبوظه علي نفسه وعلي الناس اللي فيه ! ومش عاجبه كمان إننا ناخد ضده إجراء .
مواقف كتيييييييير بتحصل هنا في الموقع ومواقف أكتر بتحصل بردة في الكلية والدروس وغيره وغيره والسبب مواقف وكلام وعلاقات في المنتدي !
نرجع بقي لموضوعنا وهو إنت داخل ليه !
النت ده إتعمل عشان إيه ؟ فيه ناس عملوه عشان يستفادوا من بعض وخبرات بعض ، والخبراات كتيييييييييييير سواء خبرات بقي تعليمية أوخبرات حياتية أو غيرها أو خبرات خاصة :blush: ! بس هل إنت شايف إن ده الغرض الحقيقي من النت ؟ ولا عشان ربنا سبحانه وتعالي كرمك بنظام إنك تجيب إنت وبتاع 100 واحد معاك خط نت وتوصلوا منه وكل واحد يدفع 10 جنيه ولا بتاع وتجيبوا خط نت فلازم تستفاد بكل جنيه من النت ده !
* مش عارف أظبط بنات في الشارع ... إشطة مهو ماليين النت ! * محدش معبرني في الشارع ... إشطة أنا بس أعملي إسم دلع ( دودي , سوسو , نوسة النعنوشة ) وأدخل أي شات والشباب هيبدأ يريل وأنا أنقي ! * آآآآآخ البلد بتقول علينا إرهابيين ومش عارفين لا ناخد حقنا ولا نعلق يفط ولا نعمل أي حاجة ولا ننشر أفكارنا في البشرية ... إشطة العيال اللي عالنت دول شباب سيييييس ما يلا بينا ندخل ونلعب في عقولهم ونشوف هيفيدونا ولا لا !
دي شوية أمثلة من الناس اللي بتستغل النت في أغراض دنيئة .
إنت تعرف إنك تقدر من الإنترنت تستفيد جداً في حياتك ! تقدر تستفيد مادياً ومعنويا ً وكمان في حياتك من ناحية الخبرات وغيره وغيره ، ليه كل تخيلك عن النت إنه ياهو وماسنجر وبت حلوة ولا ولد روش هتكلمه / هتكلميه ...
ليه إنت فاكر إن النت بالنسبة ليك إنك عايز تعرف عن فلانة حاجة فداخل تعمل روش وتعمل موضوع تشوف رأي الناس في المنتدي "وخاصة الفيميال" << معلش يا عسكر علي الخطأ في الكتابة .
والغرض إن كله يرد ويشوف رأي الناس "وهي أكيد أكيد من ضمنهم" ! مهو بالعقل كدة أنا مش هدخل المنتدي عشان خاطر أخد رأي صاحبتها إزاي أروح أتعرف عليها ! وبردة بالعقل اللي ربنا كرمنا بيه . أنا راجل وكبير ومخلص وإمتياز ولا مخلص إمتياز ... هسيب كل اللي ورايا وأدور علي المنتدي وأسجل فيه وأسيب كل شغلي وكل اللي بعمل فيه عشان أعمل موضوع وأرد عليه وأتابع بقي ومفيش رد مسيبوش ! لا وكمان أسجل بعضوية تانية ، وأرد علي نفسي لنفس الغرض اللي جوايا ! وعشان أكسب إحترام الناس وأضمن إنهم هيردوا ويمكن ميعبرونيش ( لأنهم ممكن يكونوا في عضويتي التالتة "اللي منعرفهاش" محدش فيهم بيعبرني "أو هي يعني بتعبرنيش" ) ... للدرجة دي وصل بينا التفكير ؟
الموضوع ده بيفكرني لما واحد عايز يتعرف علي واحدة وهي صاحبته أوي ويروح يقولها إيه : هو إنتي إيه رأيك لو واحد بيحب واحدة يعمل إيه ؟ هي ترد عليه وليكن علي سبيل المثال : وهي بتحبه ؟ هيقولها : مهو المشكلة إنه ميعرفش ، فتقوله : خلاص يسألها ، يقوم يبدأ نظام عبده العبيط بقي ... طب لو إنتي مكانها هتعملي إيه ؟ وده كله علي أساس إن الإتنين مش فاهمين هما بيتكلموا في إيه ولا عن إيه وكل واحد باين جداً في عينيه ، والأنقح بقي إن الموضوع باين أوي علي الطرفين .... مهو إتنين مستريحين لبعض ، مع بعض في كل حاجة ، مهتمين ببعض ، اللي بيتكلم عن بنت أو شخصية معينة كتير فبكل بساطة عاجباه أو عاجبها ، ده مبدأ مسلّم بيه .
إيه رأيك هي قاعدة النهاردة هنا ليه ؟ هي مجتش الكلية ليه متعرفش / متعرفيش ؟ هي عملت إيه في مش عارف إيه ( إمتحان وليكن ) ؟
وغيرها ...
إحنا ليه بنحبش نختصر علي نفسنا الأمور ونريح نفسنا .
نسيب موضوع الحب والعلاقات والـ Dating اللي ماشي ف المنتدي ده ، ونيجي لموضوع تاني غيره وهو موضوع التحرش اللي ناس كتير رجعت تتكلم فيه تاني أو بدأو يتكلموا فيه :
علي رأي واحد أو فيلم يعني "مفيش حد يوسع البنااااطيل دي جدعان" ، أو حملة وسعي بنطلونك وإرفعيه حاجة زي كدة ماشية ف مواقع كتيييير ، هي الناس اللي داخلة تتكلم عن التحرش واللي بيحصل شافوا اللي حصل ؟ ولا شافوا اللي بيتعمل ولا شافوا رد فعل البنت وقتها ، ولا هو مجرد نقل كلام بردوا ، وهل الصحفي اللي كتب كدة كتب كدة عشان فعلاً هو متضايق ولا الناس أو البنت متضايقة من التحرش !
وهل فعلاً ممكن واحد يتحرش بواحدة ولو معجبهاش التحرش يقوم يطلع للـ level اللي بعده ويرفع عليها مطواة <<< ده علي أساس إننا مثلاً وليكن في بنهاYork والواد جون بقي مش عاجبه ....
أنا شفت شباب كتيييير والموضوع بيكون بكذا شكل وفي الغالب البنت بتكون راضية جداً والأمر عاجبها أوي ، أو لدرجة إنها يمكن فاضل تحط يافطة "للتحرش فقط" !
اللي يروح يكلمها ويقولها علي فكرة إنتي عاجباني كيك وبتاع وعايز أتعرف عليكي من الصبح ويمسك إيديها ويقوم كاتب رقمه ! اللي يحرقك إنها بتتصل <<< وربنا يخلي لنا روك واللي عرفته مؤخراً روجينا ... ده كافيه دلع والله .
طب موقف بقي يحرق الدم : " صديق جاي من قنا إتصل بيا ، عزمت عليه يجي البيت نتغدي فقالي معلش معايا ناس وكدة ومش هعرف أجي قلت أروح أشوف الراجل وأهو فيه لانجولتو "ربنا يرجعه بالسلامة" والطاهي .. وغيرهم ، المهم رحت نازل وبتصل بيه وأنا علي الكوبري قالي لا أنا سبت الجامعة ورحت كافيه في طريق الموقف إسمه روجينا ، رحت الكافيه وبحكم إني أول مرة أشوفه فرنيت عليه المهم ظهر وطلع لي ولقيت قاعد معاه ما شاء الله ( بنها فيها خير الواحد ميعرفوش يا جدعان ) ، ما علينا المهم دقايق ومشيوا وفضل هو بس معايا قاعدين وبنتكلم ، وأخبار الباطنة يابني معاك وأخبار الطب والذي منه ! وفيه ورانا تليفزيون صوته عالي فحت فعمالين زي اللي بنزعق لبعض ، المهم شوية ودخلت بنت بصراحة مش عارف أوصفها بس هي مش حلوة بس ، هي حاجة كويسة أوي فقلت اللهم إخزيك يا شوشو لا وجت قعدت قصادنا بالظبط فقلت له بص يابني يلا بينا أحسن وقمت عشان أروح أحاسب وأرجع أشيل معاه حاجته ... إلا وواحد زميلنا كان إتصل في الطريق وجالي علي هناك فقعدنا تاني عشان نكمل كلامنا ، المهم رحت أحاسب ورجعت الإتنين كانوا قاعدين مع بعض ( الولدين أصحابي ) ، ورحت قعدت معاهم علي ما اللي جه ده ياخد واجبه ونمشي وكدة ، فرايح أأقعد لقيتها بتقولي ممكن توطي صوتك شوية ! فرحت قاعد وساكت ، فلقيتا بتتكلم معايا تاني وبتقولي إنت دكتور وكدة ! المهم بصراحة مقدرتش أقاوم المرة دي ، طريقة كلامها حلوة أوي وبرستيج زي الفل ، فلقتها بتتكلم في الموبايل أو بترن علي حد ! ما علينا المهم قلت لها علي فكرة المشكلة مش في الصوت المشكلة في الموبايل بتاعك صوته واطي .. قالت لي علي فكرة إتن تبقي تحفة لو تشتغل تمثيل مسرحي ، صوتك جهوري وتنفع علي المسرح ! فقلت لها اه مهو أنا فكرت في كدة بس المجموع مكفاش ، فضحكت "وراح عمرو دياب رن في دماغي : أهي ضحكت يعني حاسة هواك" بس هوا إيه جتك هِو ، المهم قلت ضحك بضحك بقي فقلت له : إحنا هقر ولا إيه ، فقالت لا لا أنا مش بقر أنا بحسد بس ... أنا جاية من المنصورة عشان أحسدك وأمشي .. والله هي قالت من كدة ورحت باصص للعيال وبصوا لي ، قلت لهم ما يلا عشان الناس اللي مستنية في الميتنج عشان منتأخرش ، وربنا لو واحد فيهم سأل السؤال الغبي "ميتنج إيه ياعم" كان ممكن أكتمه وقتها ، المهم خرجنا وقلت لها توصلي بالسلامة ، وهي بتاخد نفس الشيشة ، قلت أهلاً ورحت خارج ، خرجت برا طبعاً والشباب بيقدموا رجال وبيأخروا عشرة واللي يقولي بص إنت بقي يا إتش طريق السلامة وأنا هدخل أتعامل والي مش عارف عايز يعمل إيه "
ما علينا المهم مشينا وربنا سترها والحمد لله لأن الموضوع لو وسع شوية معرفش كان ممكن يحصل إيه ، واللي فات مثال علي بنات كتيييير أوي موجودين مع إختلاف الأشكال والأحجام والسن كمان ، ومش معني إنك عايشة في وسط مجتمع محترم وربنا كارمك بأهل بيسألوا عليكي ويتابعوكي ويشوفوا رحتي فين وجيتي منين وإن والدك إختار لك أم من أسرة كويسة متابعة معاكي كل كبيرة وكل صغيرة وبتعرف عنك كل حاجة ، إن كل البنات كدة ! فيه بنات مش كدة خااااااالص ، وفيه بنات أمهاتهم بيشجعوهم علي كدة ! وفيه وفيه ...
خلاصة الموضوع إن اللي بيحصل والتحرش مش غرضنا اللي داخلين عشانه المنتدي ! مش عشان نتخانق وده يقول عشان البنات بتلبس بالشكل الفلاني ولا عشان الواد مش متربي ولا ولا ،، الموضوع له أبعاد تانية كتيييير كلنا عارفينها كويسين ولولا الإحراج والحياء كنا نقدر نقولها فمنحاولش نتكلم في مواضيع لا تودي ولا تجيب !
إنتوا داخلين ليه ! بجد محدش فكر يسأل نفسه السؤال ده ؟ طب حد فكر في الكام سنة اللي قعد فيهم عالنت دول طلع بإيه ؟ حد عرف إيه الأفكار التانية اللي موجودة عالنت ؟
حد فكر في مرة يقرا في حاجة جديدة أو يساعد فيها ؟ بصوا كدة مثلاً علي : From Here
ده من المواقع العبقرية اللي عشان تشارك فيها أو تبقي عضو لازم تبعت لهم حاجة جديدة محدش عملها ، وبالتالي هتلاقي فيه حاجات أغرب من الخيال !
فكرت تدور عالنت علي حاجات زي كدة ؟ ولا الحاجات اللي بتدور عليها هي لمجرد المتعة !
زعلانين إننا عالم تالت ! وإحنا إزاي هنبقي دول في العالم الأأول ! وهي فين دول العالم الثاني ؟ : From Here
لما يكون فيه شباب زي الفل بيعملوا كدة ! وقاعدين علي القهاوي ولما واحد فيهم يعرف يجمع فلوس جهاز أول حاجة بيعملها بيروح داخل وجايب وصلة نت عشان يلم نفسه من القهوة بإنه يقعد يشيت ويتعرف وأهو بيسلي وقته ووقتها ! بالمناسبة الحب مش ببلاش ! فيه موبايلات وخروجات وغيره وغيره فمتورطش نفسك في علاقة غير لما تحسبها صح ولو هي معاها عربية وإشطة الحياة عندها إبقي عرفني علي أختها حتي .
أنا بقول إن الحمد لله مبقاش فيه أمية أوي ! ولا فيه أمية أوي في الكمبيوتر ، بس الأمية فعلاً بقت في إستخدام الكمبيوتر والتكنولوجيا ...
من يومين نازل للكورس ففي السريع بفضل شوية التقنية في موبايلي شغلت البي بي سي فسمعت عن فيه إجتماع في قطر علي ما أذكر عشان حل أزمة الإقتصاد العالمي وكدة ، إزاي بقي ؟ دلوقتي الدول الكبري في العالم إنضربت وكل واحد إتأثر علي حسب حجم ميزانية دولته وبالتالي كل لما تكون الدولة صغيرة ( عالم تالت ) فمش هتكون متأثرة أوي وبالتالي الإعتماد هيقي عليهم عشان يرجعوا يرفعوا إقتصاد العالم تاني .
هل إنت مستعد تعمل كدة ؟ مستعد إن بلدك عشان جهلك يتم فيها كدة ؟
عارفين أنا شايف المشكلة بجد إننا بنبص علي حوالينا وبس ، بنحاولش نوسع الدايرة شوية وبالتالي أي مشكلة بسيطة بنكبرها بناء علي تفكيرنا الخاص مش بنحاول نفكر بمنظور الناس التانية عشان نشوف حل للمشكلة ، إحنا بنحاول نطلع مشكلة من المشكلة نفسها مش حل للمشكلة .
الموضوع طول أوي وأنا مليت من الكتابة ما بالكوا من اللي بيقراه .
بالمناسبة الموضوع اللي فات خلص إن الولد راح قابل البنت ووصل بينهم الأمر لحاجة ربنا يهديهم فيها والحمد لله قدرت تحافظ علي نفسها ( مش أوي يعني ) بس الحمد لله علي كل حال .
موضوع: إنت داخل ليه ..!! 
الثلاثاء يوليو 21, 2009 6:54 pm
.
<<< وربنا يخلي لنا روك واللي عرفته مؤخراً روجينا 
