الحاجات اللي مش لازم تعرفها حبيبتك

انهارده موضوع يخص اكتر الولاد ده ميمنعش ان للبنات دور كبير اوى فيه
وياريت اسمع ردود البنات قبل ردود الولاد
هكلمكوا فى موضوع مهم بجد
هو ايه الحاجات اللى مش لازم تعرفها حبيبتك عنك
وبجد لو عرفتها هيبقى فيه مشاكل كتيير
=============================================

اول حاجه تجاربك السابقه

اه انت ممكن تحكى لاصحابك وتقولهم دانا عملت وسويت وبهدلت الدنيا وكلمت دى ومشيت مع دى
عادى شباب مع بعضينا ومحدش هيزعل من التانى لكن اوعى يا صاحبى تحكى دى لحبيبتك لانها هتفضل شايلهالك ومش هتنساهالك ابدا
--------------------------------------------------------------------
مستوى معيشتك الحقيقى

ماشى ياعم معاك ربنا يدينا ويديك بس لما تحب متبينش لحبيبتك انت مستواك المادى ايه بالضبط ليه ؟
اقولك ليه ....ممكن يا حلو ان لما البت تعرف ان انت غنى ومعاك فلوس تطمع فيك وممكن تكون مستواك المادى اقل منها وفى الحاله دى هتسيبك
---------------------------------------------------------
فتاه احلامك الخياليه

اوعى تيجى فى يوم تقول لحبيبتك او توصفلها الفتاه اللى فى خيالك او البنت اللى بتحلم بيها شكلها ايه
او تقعد تقولها ده البت منه شلبى جامده اوى ولا بموت فى منى زكى ولا رانيا الكردى قمر
ممكن تكون البنت اللى كنت بتحلم بيها احلى منها وتخليها تحبط وتحس انها اقل من البنت اللى فى خيالك
------------------------------------------------------------------
نقاط ضعفك

لازم تبقى قوى دايما قدامها ومتبنش ضعيف
من الاخر يعنى متبقاش راجل قدام اصحابك وتيجى قدامها تبقى مش عارف تعمل ايه
يعنى تحاول متبقاش عاطفى ورومانسى قوى قدامها
واهم حاجه اوعى توريها دموعك لاى سبب
----------------------------------------------------------------------
تجاربك ايام الطيش

يعنى اكيد كل واحد فينا مر بحاجات كتيير فى فتره الشباب
اول سيجاره* اول بت مشيت معاها* اول مقلب عملته فى صاحبك * لحظات الضياع والفشل
فمش لازم تقول لحبيبتك كل ده عنك
ممكن لو حكيته لواحد صاحبك يضحك وبتاع
لكن اعتقد لما تحكيه لحبيبتك مش هيبقى ظريف ابدا
خليك دايما بمظهر كويس قدامها ومحترم ونشيط ونبيه
-----------------------------------------------------------------------
تخيلاتك الغريبه

لازم تبقى تخيلاتك للمستقبل تبقى زى تخيلاتها يعنى بيت المستقبل وعدد الاطفال
وابعد بقى عن تخيلاتك الغريبه يعنى متبالغش فى تصوراتك وتخيلاتك

-------------------------------------------------------------------
ذكرياتك مع حبيبتك او خطيبتك اللى فاتت

قمه الغباء لو جيت فى يوم ووريتلها دبله الخطوبه او قلتلها المكان ده كنا بنقعد فى مع بعض
تقولك كلمه حلوه تقولها كانت بتقولى كده برده
او توريها صوركوا مع بعض
لو كنت عايز تكمل معاها على خير
-------------------------------------------------------------------------
لحظاتك المحرجه

كل واحد فينا مر بلحظاتك الحرجه فى حياته
يعنى اتقفشت تحرى مره
او مثلا خت غرامه فى المترو ومردتش تدفع
او دخلت مره حمام السيدات غصب عنك طبعا وخرجوك بالعافيه طبعا
يعنى مش لازم بقى تحكيلها اللحظات الحرجه فى حياتك خلى ليك كبرياء دايما قدام حبيبتك
---------------------------------------------------------------------------
الخـــــــــــــــــــــــــــــــداع والخيانه

يعنى لو جيت فى مره وخنتها او خدعتها بلاش تقول لها بس طبعا يبقى من جواك ندمان وتحس بغلطتك
لانها هتبدا تشك فيك فى كل تصرفاتك

شكرا ياباشا

مش معاك فى الراى
لان لو هوه بيحبها فعلا هيحكى لها عن كل جزء ف حياته
ولو هيه بتحبه بجد هتتقبل كلامه مهماكان اللى قاله

GHOST كتب:: شكرا ياباشا

شكرا انت يا باشا لمرورك

sama كتب:: مش معاك فى الراى
لان لو هوه بيحبها فعلا هيحكى لها عن كل جزء ف حياته
ولو هيه بتحبه بجد هتتقبل كلامه مهماكان اللى قاله

شكرا سما لمرور والرد الرائع

الشكر لله

شكرا